飲咗酒會變外語天才？

有無遇過一啲朋友飲咗酒之後會變咗外語天才？小編我就有遇過。

話說我有一位朋友，英文能力一般，但每次飲咗酒之後就好似洋鬼子上身咁，以一口流利嘅英文同人傾計。第一次見識到佢呢一面嘅朋友，都表現極度驚訝。當酒氣過咗之後，佢嘅英語水平又回復正常。究竟點解會咁？

荷蘭最近就有一個有趣嘅研究，研究人員好想知道究竟飲咗酒之後講外語係咪真係會流利啲？呢個研究邀請咗50位識得講荷蘭文嘅德國留學生參加，佢哋都識得講德文(母語) 同埋荷蘭文 (外語)。留學生分成兩組，一組會俾佢哋飲凍水 (對照組 Control Group)，而另一組就會俾佢哋飲含少量酒精成份嘅飲品 (實驗組 Treatment Group)。15分鐘過後，等待身體有時間吸收酒精，再叫佢哋用荷蘭文辯論。研究人員邀請咗兩位地道嘅荷蘭人觀察參加者嘅語言能力。

辯論環節後，參加者自己要幫自己剛剛嘅語言表現評分 (self rating) 同埋兩位荷蘭人都要為每位參加者嘅語言表現評分 (observer rating)。研究人員估計實驗組嘅參加者會因為飲咗酒而「自我感覺良好」，會高估咗自己嘅表現。不過！原來結果並唔係咁！

結果發現，對照組同實驗組嘅人對自己嘅語言表現嘅評分係無明顯分別。當比較荷蘭人對參加者嘅評分時，發現佢哋都覺得實驗組，即係飲咗酒嘅人，整體嘅語言表現（特別係發音呢方面），都比對照組嘅人好。

研究人員就分析，有雙語或多種語言能力嘅人，可能講外語嘅時候會相對緊張，而少量酒精有可能可以幫助放鬆心情，從而令到佢哋表現得好啲。不過研究人員強調，汲取酒精嘅濃度係要控制得好好，過多嘅酒精其實反而會令我哋講嘢變咗一舊舊。當然，呢項研究題目都比較新，需要做更多嘅研究。

不過無論點都好，酒都係唔可以飲太多，要適可而止啊！

參考資料：Moderate alcohol consumption improves foreign language skills

圖片來源：《千杯不醉》